Facturaziun ed incassament da las contribuziuns
Ina da las incumbensas principalas da la cassa da cumpensaziun è, ultra da fixar las contribuziuns, d’incassar las contribuziuns. L'incassament da las contribuziuns cumpiglia tant la facturaziun sco er il sectur da las admoniziuns e da las proceduras da scussiun e sa drizza tenor las prescripziuns legalas.
Infurmaziuns
Per regla vegnan las contribuziuns aconto messas a quint mintga quartal, a patruns cun ina summa da pajas annuala da passa CHF 200'000 mintga mais. Quints aconto èn pajabels enfin il 10avel di dal mais sequent a la facturaziun.
Ils quints per contribuziuns da gulivaziun resp. pretensiuns supplementaras èn pajabels enfin 30 dis suenter la facturaziun.
La cassa da cumpensaziun po lubir dilaziuns dals pajaments cun pajaments en ratas regulars, sch'insatgi ha difficultads finanzialas crediblas. L'emprim pajament en ratas sto succeder immediat ed era las ulteriuras ratas ston vegnir pajadas entaifer il termin fixà . Ina dilaziun dals pajaments autorisada vala sco admoniziun e daventa obsoleta, sche las cundiziuns da pajament na vegnan betg observadas.
Per contribuziuns che na vegnan betg pajadas entaifer il termin fixà pon vegnir incassads tschains da retard calculads tenor las prescripziuns legalas. Dilaziuns dals pajaments autorisadas n'interrumpan betg il curs dals termins per tschains da retard. Il tschains munta a 5% per onn.
Per contribuziuns betg debitadas, che la cassa da cumpensaziun restituescha u cumpensescha, vegnan pajads tschains da bunificaziun calculads tenor las prescripziuns legalas. Il tschains munta a 5% per onn.
Da princip na retira la cassa chantunala da cumpensaziun da l'AVS posteriuramain naginas stumaziuns gia instradadas, damai che quai sfalsifitgescha la vardaivladad dal register da las scussiuns. Sche la stumaziun è succedida cun raschun, na datti nagin motiv da retrair quella posteriuramain. Mo en cas excepziunals e sin dumonda motivada en scrit examinain nus la pussaivladad da stizzar stumaziuns or dal register.
Sut ils suandants links chattais Vus infurmaziuns davart nossas pussaivladads da pajament:
Midada da la Lescha federala davart la scussiun ed il concurs (LSC) per il 1-1-2025
A partir dal 1. da schaner 2025 entran en vigur midadas impurtantas da la Lescha federala davart la scussiun ed il concurs (LSC). Ina novaziun centrala concerna la pretensiun da contribuziuns avertas da l’assicuranza sociala AVS:
A partir dal 1. da schaner 2025 vegn fatga in’eventuala scussiun per persunas natiralas u giuridicas ch’èn inscrittas en il register da commerzi, da nov sin concurs e betg pli sin sequestraziun. Interpresas e persunas cun activitad da gudogn independenta che na pon betg ademplir lur obligaziuns finanzialas vegnan supplitgadas da la dretgira da liquidar ils quints averts en il rom d’ina procedura da scussiun. Sch’ellas na pajan betg, declera la dretgira cumpetenta il concurs ed il manaschi vegn serrà .
Las cassas da cumpensaziun ston realisar questas novas prescripziuns legalas e n’han nagina influenza sin questas midadas. Persunas che n’èn betg inscrittas en il register da commerzi vegnan era vinavant stumadas sin sequestraziun.
Scussiuns e proceduras da concurs èn colliadas per il debitur resp. la debitura cun custs considerabels e malempernaivladads che pon vegnir evitads cun pajar las pretensiuns entaifer il termin u cun far ina cunvegna da pajament.
Ulteriuras infurmaziuns: Merkblatt 2.14 Bekämpfung des missbräuchlichen Konkurses