Purtret

L'Institut d'assicuranza sociala dal chantun Grischun (IAS) è in'instituziun autonoma da dretg public cun atgna persunalitad giuridica. Sia sedia sa chatta a Cuira.

L'IAS coordinescha las lavurs da la cassa chantunala da cumpensaziun da l'AVS en il rom da las leschas federalas davart l'assicuranza per vegls e survivents (AVS), davart l'urden da cumpensaziun dal gudogn (UCG), davart ils supplements da famiglia en l'agricultura (LSA) e las lavurs da l'Uffizi chantunal da l'AI en il rom da la Lescha federala davart l'assicuranza d'invaliditad (AI). En pli è el responsabel per las contribuziuns en il sectur da l'Assicuranza cunter la dischoccupaziun (AD).

Ultra da quai s'occupa l'IAS da las suandantas incumbensas attribuidas ad el dal chantun Grischun:
prestaziuns supplementaras (PS) a l'AVS ed a l'AI, supplements da famiglia chantunals (CCF) e reducziuns individualas da las premias da la cassa da malsauns (RIP).

L'IAS è suttamess a la surveglianza federala ed a sias directivas, tant enavant ch'el ademplescha sias incumbensas en il rom d'ina lescha federala. Cun ademplir incumbensas dal dretg chantunal è el sut surveglianza dal chantun Grischun.

Ils organs da l'IAS èn la cumissiun administrativa, la direcziun ed il post da revisiun.

• Organigramm

La cumissiun administrativa

Stadi: 01.07.2024

Commembras e commembers:
Kurt Baumgartner, Kirstin Meier-Künzle, Dr. Hans Martin Meuli, Monika Lorez-Meuli, Kevin Brunold, Gabriela Menghini-Inauen, Andreas Thöny