Actualitads
Temps d'avertura sur Nadal e Bumaun 2024/2025
Sur ils dis da festa restan ils biros da l'Institut d'assicuranza sociala serrads ils suandants dis:
• mardi, ils 24-12-2024
• mesemna, ils 25-12-2024
• gievgia, ils 26-12-2024
• mardi, ils 31-12-2024
• mesemna, ils 01-01-2025
• gievgia, ils 02-01-2025
L'onn nov essan nus a partir da venderdi, ils 3 da schaner 2025, puspè qua per Vus. Nus giavischain a Vus bellas festas da Nadal e tut il bun per l'onn nov.
---- 16.12.2024 ----
Decleraziun da paja 2024
Vus avais survegnì da nus ils documents necessaris per la decleraziun da paja 2024. Il formular emplenì stuais Vus inoltrar fin il pli tard ils 30 da schaner 2025.
Cun il portal online AHVeasy pon patrunas e patruns reducir lur lavur administrativa. La decleraziun da paja pon ins emplenir e trametter cumadaivlamain e senza palpiri online. Er ulteriuras annunzias pon ins far online cun la Cassa da cumpensaziun – gratuit, simpel ed effizient.
---- 16.12.2024 ----
Survista Imports valaivels per ils 01.01.2025
Per il 01.01.2025 na datti naginas midadas areguard las contribuziuns per la AVS/AI/EO e per la cassa da cumpensaziun per famiglias. Ils imports limitads per la prevenziun professiunala vegnan midads.
---- 12.12.2024 ----
Pajaments principals mensils rentas, indemnisaziuns a persunas dependentas d'agid e prestaziuns supplementaras 2025
---- 09.12.2024 ----
Infurmaziun impurtanta: Midada da la Lescha federala davart la scussiun ed il concurs (LSC) per il 1-1-2025
A partir dal 1. da schaner 2025 entran en vigur midadas impurtantas da la Lescha federala davart la scussiun ed il concurs (LSC). Ina novaziun centrala concerna la pretensiun da contribuziuns avertas da l’assicuranza sociala AVS:
A partir dal 1. da schaner 2025 vegn fatga in’eventuala scussiun per persunas natiralas u giuridicas ch’èn inscrittas en il register da commerzi, da nov sin concurs e betg pli sin sequestraziun. Interpresas e persunas cun activitad da gudogn independenta che na pon betg ademplir lur obligaziuns finanzialas vegnan supplitgadas da la dretgira da liquidar ils quints averts en il rom d’ina procedura da scussiun. Sch’ellas na pajan betg, declera la dretgira cumpetenta il concurs ed il manaschi vegn serrà .
Las cassas da cumpensaziun ston realisar questas novas prescripziuns legalas e n’han nagina influenza sin questas midadas. Persunas che n’èn betg inscrittas en il register da commerzi vegnan era vinavant stumadas sin sequestraziun.
Scussiuns e proceduras da concurs èn colliadas per il debitur resp. la debitura cun custs considerabels e malempernaivladads che pon vegnir evitads cun pajar las pretensiuns entaifer il termin u cun far ina cunvegna da pajament.
Ulteriuras infurmaziuns: Merkblatt 2.14 Bekämpfung des missbräuchlichen Konkurses
---- 28.11.2024 ----
Las tariffas minimalas dals supplements da famiglia vegnan augmentadas
Per il 1. da schaner 2025 vegnan augmentadas las quotas minimalas federalas dals supplements per uffants e da scolaziun. Ils supplements per uffants vegnan augmentads da 200 sin 215 francs al mais ed ils supplements da scolaziun da 250 sin 268 francs al mais. I sa tracta da l'emprima adattaziun sin plaun federal dapi che la Lescha federala davart ils supplements da famiglia è ida en vigur il 2009.
En il chantun Grischun èn ils supplements per uffants e scolaziun tenor las Disposiziuns executivas concernent la Lescha davart ils supplements da famiglia (DEtLSF) mintgamai pli auts che las tariffas minimalas ed importan uschia 230 francs per supplements per uffants resp. 280 francs per supplements da scolaziun.
Per ils supplements da famiglia en l'agricultura datti in'excepziun: per quels valan las tariffas dal dretg federal. Consequentamain vegnan quels supplements augmentads analog a las quotas minimalas.
| Da nov en las regiuns muntagnardas a partir dal 01-01-25 supplements per uffants: 235 francs supplements da scolaziun: 288 francs |
Da nov en las regiuns da la val a partir dal 01-01-25 supplements per uffants: 215 francs supplements da scolaziun: 268 francs |
---- 28.11.2024 ----
Prestaziuns supplementaras (PS) – tariffas valaivlas a partir dal 1.1.2025
---- 07.11.2024 ----
Reducziun individuala da las premias (RIP) da l'assicuranza da malsauns per l'onn 2024
---- 24.10.2024 ----
La renta minimala da l'AVS/AI s'augmenta per 35 francs
A partir dal 1. da schaner 2025 vegnan las rentas da l'AVS/AI adattadas al svilup dals pretschs e da las pajas ed augmentadas per 2,9 pertschient. La renta minimala da l'AVS/AI munta da nov a 1'260 francs per mais. A medem temp datti adattaziuns er en il champ da las contribuziuns sco era tar las prestaziuns supplementaras e las prestaziuns transitoricas.
---- 12.09.2024 ----